© Vangelo di Marco. Traduzione in sardo campidanese, variante del Sarcidano isilese,
di Antioco e Paolo Ghiani ; consulenza esegetica di Antonio Pinna

Marcu 5,1-43

¹E fiant andaus a s’atru oru de su mari, a is partis de is Gerasenus. ²Candu ndi fut abasciau de sa barca, illuegu de mesu de is monimentus fut bessiu a dd’atobiai un’omini cun d’unu spiritu malu ³chi iat postu domu in is tumbas e nemus ddu podiat prus acapiai mancu a cadena: ⁴ca fisciu fut istetiu acapiau cun travas e cadenas, ma issu iat truncau is cadenas e segau is travas e nemus nci dda faiat prus a ddu domai. ⁵E a totu dì e a totu noti, per is tumbas e per i montis, fiat tzerriendi e ferendusì cun perdas. ⁶Duncas candu iat biu a Gesùs, de aillargu, iat curtu e si ddi fut ingenugau ananti, ⁷e tzerriendi a boxi manna, narat: «Ita tengiu de biri cun tui, Gesùs, Fillu de Deus su totu artu? Ti ddu pedu po Deus, non mi trumentis». ⁸ Ca ddi naràt: «Bessinci spiritu malu de custu omini». ⁹E ddi pregontàt: «Cali est su nomini tu?». E ddi narat: «Legioni, est su nomini miu, ca seus medas». ¹⁰E ddu pregàt meda a non nci ddu mandai a foras de cussus logus.¹¹ Pascendi innia in su monti ddu iat unu tallu mannu de procus. ¹²E ddu pregànt narendiddi: «Mandasinci anca is procus, po nci ddis intrai aintru». ¹³E si ddus iat acantzau. Is spiritus malus comenti ndi fiant bessius, nci fiant intraus aintru de is procus. E su tallu, si nci fut ispentumau de un’atza a su mari, iant essiri duamilla, e si fiant allupaus in su mari.

¹⁴Is chi fiant pascendiddus si fiant fuius e iant torrau a contai sa nova in sa tzidadi e in su sartu e fiant bessius a biri su chi fut sussediu. ¹⁵Lompint acanta de Gesùs e bint su chi fut in poderi de su dimoniu setziu, bestiu e torrau in sentidu, cuddu chi fiat stetiu possedìu de sa legioni, e iant timiu. ¹⁶E cussus chi iant biu, ddis iant contau comenti fut sussediu a su chi fiat istetiu in poderi de su dimoniu e su contu de is procus. ¹⁷E iant cumentzau a ddu pregai a si nd’andai de is terras insoru. ¹⁸Candu fut artziendinci a sa barca su chi fut istetiu in poderi de su dimoniu, ddu pregàt a ddu fai abarrai cun issu. ¹⁹E non dd’iat lassau, ma ddi narat: «Bai a domu tua, anca est sa genti tua e conta a issus su chi t’at fatu su Sennori e ca t’at lastimau. ²⁰E si ndi fut andau e iat cumentzau a predicai in sa Decapoli su chi dd’iat fatu a issu Gesùs e totus abarrànt spantaus.

²¹E Gesùs nci fiat imperrau torra a barca a s’atra parti e si fut pinnigada genti meda anca fut issu. ²²E lompit unu de is maioris de sa sinagoga, ddi narànt a nomini Giàiru, e biendiddu si nci getat a peis suus ²³e ddu pregat meda, narendi: «Filla mia est acabbendusì, beni e poniddi is manus po dda sanai e po dda fai bivi. ²⁴E fut andau cun issu e ddi poniat infatu genti meda e dd’apretànt de donnia parti. ²⁵E una femina chi de doxi annus teniat unu scolu de sanguni ²⁶e iat patiu meda po mori de medas dotoris, spendendi totu su chi teniat, chentza de ndi tenni prou perunu, antzis ndi fut andada prus in peus, ²⁷candu iat intendiu de Gesùs, fiat bennia de palas in mesu de sa genti e dd’iat tocau su bestiri. ²⁸Ca naràt: «Chi ddi tocu assumancu su bestiri, ap’a sanai». ²⁹E illuegu sa vena de su sanguni si ddi fut sicada e iat intendiu in su cropus ca fut istetia sanàda de su mali. ³⁰E Gesùs illuegu ca si ndi fut sapìu in sei e totu de su poderi chi ndi ddi fut bessiu, furriendusì anca fut sa genti, naràt: «E chini m’at tocau su bestiri?». ³¹E is iscientis suus dd’iant nau: «Bis sa genti apretendudì e naras: Chini m’at tocau?». ³²E si castiàt totu a fùrriu, po biri cussa chi dd’iat fatu. ³³Sa femina timendi e tremendi, ca isciat su chi ddi fut sussediu, fut bennia e si nci ddi fut getada ananti e dd’iat nau totu sa beridai. ³⁴Issu dd’iat nau: «Filla, sa fidi tua t’at sanau. Baidìndi in paxi e abarra sana de su mali tuu».

³⁵Megàt ancora de fueddai, candu benint de domu de su maiori de sa sinagoga narendi: «Filla tua s’est morta, poita strubas ancora su Maistu?». ³⁶Gesùs, ca iat intendiu su fueddu chi fiat nendi, narat a su maiori de sa sinagoga: «Non timas, crei feti». ³⁷E cun issu no iat lassau sodigai a nemus, foras che a Perdu e a Giacu e a Giuanni, su fradi de Giacu. ³⁸E lompint a domu de su maiori de sa sinagoga e bidi su treulu e is chi funt prangendi e atitendi meda. ³⁹E fiat intrau e ddis narat: «Poita faeis treulu e prangeis? Sa pipia no est morta, est dromia». ⁴⁰E cuddus si nd’arrìant de issu, ma issu nc’iat bogau a foras a totus e pigat a su babu de sa pipia e a sa mama e a is chi fiant cun issu e nc’intrat anca fut sa pipia. ⁴¹ E iat pigau sa manu de sa pipia e ddi narat: «Talità cum!». Comenti e a nai: «Sa pipia, pesadindi, ti nau!». ⁴²Illuegu sa pipia si ndi pesat e si ponit a caminai, ca teniat doxi annus. E si fiant spantaus de unu spantu mannu. ⁴³E ddus iat beni pretzetau chi nemus dd’essit avreguau, e iat nau a ddi donai a papai.