© Vangelo di Marco. Traduzione in sardo campidanese, variante del Sarcidano isilese,
di Antioco e Paolo Ghiani ; consulenza esegetica di Antonio Pinna

Marcu 7,1-37

¹E si pinnigant anca fut issu is fariseus e unuscantus ominis de lei bènnius de Gerusalemi. ²E candu iant biu ca unuscantus de is iscientis suus non papant cun is manus nidas, iat essiri a narri chentza de si ddas sciacuai, ³- ca is fariseus e totus is Giudeus non papant chi non si sciacuant is manus cun d’una farrancada, pumpiendi  su connotu de is antigus ⁴e candu furriant de su mercau non papant chi non si sciacuant, e tenint fintzas e atras cosas medas chi ant connotu de apumpiai: sciacuaduras de tassas, de tianus e de istrexus de arramini [e istoias] - ⁵is fariseus e is ominis de lei ddi pregontant: «Poit’est chi is iscientis tuus non sighint su connotu de is antigus e papant chentza de is manus nidas?».

⁶E issu ddis ist nau: «Iat profetau giustu de bosatrus, Isaia, fraitzus, comenti ddu at iscritu:

Custu populu m’onorat cun is lavras,

ma su coru insoru est aillargu de mimi;

⁷m’onorant de badas

imparendi imparus, pretzetus de ominis.

⁸Lassendi su pretzetu de Deus, apumpiais su connotu de is ominis». ⁹E ddis naràt: «Sbuidais giustu su pretzetu de Deus po achistiri su connotu de bosatrus. ¹⁰Mosè iat nau fintzas: “Onora a babu tuu e a mama tua”, e, “a chini maledixit a su babu e a sa mama, siat acabau cun sa morti”. Ma bosatrus narais: Chi un’omini narat a su babu o a sa mama: “Est Korban, su chi iast a depiri arriciri de agiudu de mei, est a nai, est una impromitentzia, ¹²non ddi lassais fai prus nudda po su babu o po sa mama ¹³torrendi a nudda su fueddu de Deus po su connotu chi s’eis tramandau bosatrus. E cosas aici ndi faeis medas».

¹⁴E iat tzerriau torra a sa genti e ddis naràt: «Ascurtaimì totus e cumprendei: ¹⁵Non s’agat nudda in foras de s’omini chi intrendinceddi aintru ddu potzat amaciai. Est su chi ndi bessit de s’omini chi amàciat a s’omini! (¹⁶).

¹⁷E candu nci fut intrau a domu, aillargu de sa genti, is iscientis suus dd’iant pregontau de sa parabula. ¹⁸E dd is narat: «Tandus seis fintzas e bosatrus chentza de sentidu? Non cumprendeis ca totu su chi est a parti de foras, intrendudinci aintru de s’omini, non ddu podit amaciai, ¹⁹ca non nci dd’intrat a su coru, ma a brenti e nci dd’acabat in sa bassa?», faendi sintzilla donnia cosa de papai. ²⁰E naràt: «Su chi ndi bessit de s’omini, cussu est chi amàciat a s’omini. ²¹Ca de aintru de su coru de is ominis ndi bessint is pentzamentus malus: bregungias, furas, mortis, ²²adulterius, susunchentzias, malesas, trassa, disonestai, ogu malu, frastimu, fari mannosu, locura. ²³Totus custas cosas malas ndi bessint de aintru e amaciant s’omini».

²⁴Tandus si ndi fut pesau e si ndi fut andau de innì a is partis de Tiru e fut intrau a una domu e boliat a no ddu sciri nemus, ma non fut potziu abarrai cuau. ²⁵Antzis illuegu dd’iat avreguau una femina chi teniat una fillixedda chi portat unu spiritu malu, issa, lompia, si nci ddi fut getada a peis. ²⁶Sa femina fut greca, de genti Sirofenissa, e ddi pediat a nci bogai su dimoniu de sa fillixedda sua. ²⁷E issu ddi naràt: «Innantis lassa chi ndi siat bogau su famini a is pipius, ca no est giustu a ndi pigai su pani de is pipius po nci ddu fuliai a is calleddus». ²⁸E issa iat arrespustu, e ddi narat: «Sennori, fintzas e is calleddus, asuta de sa mesa, si papant sa farinalla de is fillus». ²⁹E dd’iat nau: «Po custu fueddu, bai: su dimoniu nd’est bessìu de filla tua. ³⁰Torrada a domu sua, iat agatau sa filla arrimada in su letu e su dimoniu ndi fut bessiu.

³¹E nci fut bessiu torra a is partis de Tiru, fut passau in Sidoni e fut torrau a su mari de sa Galilea a tretu de mesu de is lacanas de is Dexicitais. ³²E nci ddi portant unu chi fut surdu e achichiadori e ddi pedint a ddi ponni sa manu, ³³e pighendindeddu a parti aillargu de sa genti, dd’iat postu is didus in ogus, iat fatu salìa e dd’iat tocau sa lingua, ³⁴e pesaus is ogus a  celu iat suspirau e ddi narat: «Effatà, est a nai, oberidì totu!». ³⁵E illuegu si ddi fiant obertas is origas e si ddi fut istrobìu su nuu de sa lingua e fueddàt paris. ³⁶E ddus iat pretzetaus a non nai nudda a nemus; ma prus ddus pretzetàt e tantis prus ddu bogànt a craru. ³⁷ E abarrànt spantaus meda meda e narant: «At fatu beni donnia cosa, fait intendiri is surdus e fueddai is mudus!».