© Vangelo di Marco. Traduzione in sardo campidanese, variante del Sarcidano isilese,
di Antioco e Paolo Ghiani ; consulenza esegetica di Antonio Pinna

Marcu 10,1-52

¹E partiu de innì fut lompiu a is lacanas de sa Giudea, oru oru de su Giordanu e genti si fut pinnigada torra anca est issu e comenti fut avesu a fai ddis donàt imparu.

²E acostiaus fariseus po ddu tentai, ddi pregontànt chi dd’est litzitu a su pobiddu a arrefudai sa pobidda ³E issu iat arrespustu e dd’is iat nau: «A bosatrus ta s’at pretzetau Moisè?». ⁴Issus iant arrespustu: «Moisè at pretzetau de iscriri una carta de arrefudu e a nci dda bogai». ⁵Gesùs ddis iat nau: «Issu iat scritu custu pretzetu po mori de su coru tostau cosa de bosatrus». ⁶A printzipius perou de sa creatzioni ddus iat fatus mascu e femina. ⁷Po cussu s’omini at a lassai su babu e sa mama sua [e s’at a giungi a sa femina sua] e ⁸issus duus ant’essiri una carri feti. Aici non funt prus duus ma una carri. ⁹Duncas su chi Deus at giuntu, no ddu depit scrobai s’òmini». ¹⁰E is iscientis, in sa domu ndi ddi torrànt a pregontai. ¹¹E ddis iat nau: «Chini arrefudat sa pobidda e si coiat cun d’un’atra fait farta [de fidi] contras a issa ¹²e chi issa arrefudat su pobiddu e si ndi coiat un’atru fait farta».

¹³E nci dd’aporriant is pipius po ddus tocai, is iscientis suus perou ddus ameletzànt. ¹⁴Gesùs biendi sa cosa si fut arrennegau e ddis iat nau: «Lassai chi is pipius acostint anch’est mimi e non si ddu proibais; ca s’arrènniu de Deus est de is chi funt cumenti de icustus. ¹⁵Amen, si naru: chini no at a arriciri s’arrènniu de Deus cumenti de unu pipiu, no ddu’at a intrai». ¹⁶E imprassendiddus ddus benedixiat ponendiddis is manus in pitzus.

¹⁷E candu fut bessencinci a sa bia, ndi fut suncurtu unu tali chi ingenugau ananti suu ddi pregontàt: «Maistu bonu, ita ap’a fai po eredai sa fida eterna?». ¹⁸Gesùs dd’iat arrespustu: «Poita mi naras bonu? Nemus est bonu, chi no unu feti: Deus. ¹⁹Connoscis is cumandamentus: non bociast, non fatzas farta a sa coia, non furist, non fatzas su testimongiu frassu, onora a babu tuu e a mama tua».

²⁰Tandus issu dd’iat nau: «Maistu, totu custas cosas ddas apu arrispetadas giai de sa gioventudi mia». ²¹Gesùs tandus dd’iat castiau, dd’iat stimau e dd’iat nau: «Una cosa feti t’amancat: bai, totu su chi tenis bendididdu e donaddu a is poburus e as a tenniri unu tesoru in su celu; agoa beni e sodigamì». ²²Issu annuau po custus fueddus, si ndi fut andau intristau, ca fiat unu chi teniat propiedais mannas.

²³E Gesùs, castiendusì a ingiriu iat nau a is iscientis suus: «Ta traballosu at essiri, po is chi tenint arrichesas, a nc’intrai a s’arrenniu de Deus!». ²⁴Is iscientis fuant spantaus po is fueddus suus. E Gesùs iat arrespustu torra e ddis narat: «Fillus mius, cumenti est treballosu a nc’intrai a s’arrenniu de Deus! Est prus facili po unu camellu a nci passai in d’unu cossu de agu che po un’arricu a nc’intrai a s’arrenniu de Deus!». ²⁶E issus prus e prus spantaus, narànt intra issus: «E chini s’at podiri sarvai?». ²⁷Castiendiddus Gesùs iat nau: «Po is ominis non si podit fai, no anch’est Deus, perou: ca anch’est Desus si podit donnia cosa!».

²⁸Perdu si fut postu a ddi nai: «Mira, nosu eus lassau totu e t’eus postu infatu». ²⁹Gesùs dd’iat nau: «Amen, si nau: non nci at nemus chi apat lassau domu, o fradis, o sorris, o mama, o babu, o fillus, o cungiuas po mimi e po s’evangeliu, ³⁰chi no arriciat, imoi e totu, domus e fradis e sorris e mamas e fillus e cungiaus impari cun trumentus e in su [tempus] benidori sa fida eterna. ³¹Medas ant’essiri de primus urtimus e de urtimus primus».

³²Fiant in sa bia artziendinci a Gerusalemi e Gesùs fut caminendi ananti insoru e issus fiant spantaus; e is chi fiant infatu fiant timendi. E pigaus torra is Doxi, iat cumentzau a ddis nai is cosas chi depiant sussediri. ³³«Mirài, nci artziaus a Gerusalemmi e su Fillu de s’omini dd’ant a intregai a is predis maioris e a is ominis de lei, dd’ant a cundennai a morti e dd’ant a intregai a is istrangius ³⁴e dd’ant fai scerriu, dd’ant a prenni de ispudus, dd’ant a carrigai de aciotus e dd’ant a bociri a agoa de tre dis at a arresuscitai».

³⁵Tandus si ddu’ acostiant Giacu e Giuanni, fillus de Zebedeu nendiddi: «Maistu, boleus chi si fatzast su chi seus po ti pediri». ³⁶E issu ddis iat nau: «Ita boleis a si fai?». ³⁷Issus dd’iant nau: «Acantzasì a si setzi unu a manu dereta e s’atru a manu de manca, in sa groria tua». ³⁸Gesùs tandus ddis iat nau: «No iscieis ita seis pedendi. Nci podeis bufai su calixi chi mi bufu deu o essiri batiaus  cun su batiu cun su cali deu apu a essiri batiau?». ³⁹E issus iant arrespustu: «Gi podeus!». Gesùs ddis iat nau: «Su calixi chi mi bufu deu, gi si ddeis a bufai e gi eis a essiri batiaus cun su batiu chi batiant a mimi. ⁴⁰A si setziri perou a manu dereta mia o a manu de manca non tocat a mei a ddu donai, est po chini est istetiu aprontau».

⁴¹E intendendiddus, is atrus dexi iant cumentzau a s’arrennegai cun Giacu e cun Giuanni. ⁴²Tandus Gesùs ddus iat tzerriaus e ddis iat nau: «Scieis ca is chi funt cuntzideraus is capus de in natzionis, ddas cumandant e is maioris insoru tenint su poderi a pitzus insoru. ⁴³No est aici in mesu de bosatrus perou, e chini s’at a bolli fai mannu in mesu de bosatrus, at essiri srebidori de bosatrus ⁴⁴e chini in mesu de bosatrus at a bolliri essiri su primu, at essiri su srebidori de totus. ⁴⁵Difatis su Fillu de s’omini no est benniu po essiri srebiu, ma po srebiri e po donai sa vida sua a ischitiu po medas».

⁴⁶E fiant lompius a Gericu e candu ndi fut bessendi de Gericu cun is iscientis suus e cun genti meda, su fillu de Timeu, Bartimeu, su pedidori tzrupu, fut setziu in s’oru de sa bia, [pedendi]. ⁴⁷E issu comenti iat intendiu ca ddui fut Gesùs, su Natzarenu, iat cumentzau a tzerriai e a nai: «Fillu de David, Gesùs, tenindi piedai de mimi!». ⁴⁸E medas dd’amaletzànt po ddu  scitiri, issu perou, tzerriat prus meda: «Fillu de David, piedai de mimi!». ⁴⁹E Gesùs si fut frimau e iat nau: «Tzerriaiddu!». E tzerriant a su tzrupu, nendiddi: «Fai coragiu! Pesadindi, est tzerriendutì.». ⁵⁰Issu, fuliau su manteddu suu, si ndi fut istrantaxau e fut acostiau anca fut Gesùs. ⁵¹E dd’iat arrespust Gesùs e iat nau: «Ita bolis a ti fai?». E su tzrupu dd’iat nau: «Rabbunì, faimì torrai a biri». ⁵²E Gesùs dd’iat nau: «Bai, sa fidi tua t’at sarvau». E in s’ora e totu iat torrau a biri e iat cumentzau a ddi ponni infatu in sa bia.