© Vangelo di Marco. Traduzione in sardo campidanese, variante del Sarcidano isilese,
di Antioco e Paolo Ghiani ; consulenza esegetica di Antonio Pinna

Marcu 12,1-44

¹E iat incumentzau a ddis fueddai in paràbulas: «Un’omini iat postu una bingia e dd’iat ingiriada cun d’una cresura, ddu iat istuvau unu lacu e iat frabicau una turri, agoa dd’iat donada a pesoni a is bingeteris e si ndi fut andau foras. ²In su tempus iat mandau anch’est is messaius su srebidori, po ndi pigai su frutu de sa bingia; ³e issus dd’iant pigau e dd’iant scutu e nci dd’iant bogau chentza de nudda. ⁴E ddis iat torrau a mandai un’atru srebidori e a i custu dd’iant pistau sa conca e dd’iant carriau de fueddus malus. ⁵Nd’iat mandau un’atru e dd’iant bociu e medas atrus a chini dd’iant scutu, a chini dd’iant bociu. ⁶Ndi teniat ancora unu, su fillu stimau. Po urtimu ddis iat mandau a issu, narendi: «Ant a tenniri arrispetu po fillu miu». ⁷Cussus messaius perou si narànt intra issus: «Custu est s’eredeu. Tocai, ddu boceus, e s’eredai at essiri sa nosta». ⁸E dd’iant pigau e dd’iant bociu e nci dd’iant fuliau a foras de sa bingia. ⁹Ita at a fai [duncas] su meri de bingia? At a benniri, at a bociri is messaius e at a donai sa bingia a atri. ¹⁰E no dd’eis lìgia, custa Scritura?

Sa perda chi is maistus ant scartau

dd’ant posta a perda de contonada

¹¹Custu dd’at fatu su Sennori,

est cosa de spantu a is ogus nostus?».

¹²E cicànt de ddu tenturai, perou iant timiu a sa genti, ca iant cumprendiu ca cussa parabula dd’iat nada po issus. E dd’iant lassau e si ndi fiant andaus.

¹³E ddi mandant unus cantus fariseus e erodianus po ddu cassai in faddinu de fueddus. ¹⁴Cussus, lompius, ddi narant: «Maistu, scieus ca ses beridadosu e non ndi fais contu de nemus, e non castias in faci a is ominis, ma cun beridai imparas sa bia de Deus. A donai sa tacia a Cesari litzitu est o no? Si dda depeus donai o non si dda depeus donai?». ¹⁵Connoscendi sa frassìa insoru ddis iat nau: «Poita mi tentais? Aporreimì unu soddu po ddu biri!». ¹⁶E si dd’iant aportu. E ddis narat: «Custa magini, de chini est? E i custu scritu?». E issus dd’iant nau: «De Cesari». ¹⁷Gesùs tandus ddis iat arrespustu: «Su chi est de Cesari torraiddu a Cesari e su chi est de Deus a Deus». E nd’iant tentu amiru de issu.

¹⁸E lompint anch’est issu unus cantus sadduceus, chi nant ca non nci at arresurretzioni e dd’iant pregontau, narendi: ¹⁹«Maistu, Moisè s’at iscritu ca, chi essat mortu su fradi de unu e essat lassau sa pobidda e non lassat fillus, su fradi suu pighit sa pobidda e pesit eredeu a su fradi. ²⁰Nc’iat seti fradis e su primu iat pigau pobidda e morendi no iat lassau eredeu. ²¹Si dd’iat pigada su de duus e si fut mortu chentza de lassai eredeu, e su de tres sa propiu cosa ²²e totu a is seti no iant lassau eredeu. E agoa de totus si fut morta sa pobidda puru. ²³In s’arresurretzioni, cadu ant essiri arresuscitaus de cali de issus at essiri sa femina? Ca dd’ant tenta totus a is seti a pobidda?». ²⁴Gesùs ddis iat nau: «No ca seis faddendi. Ca non conosceis is Iscrituras e nemancu su poderi de Deus? ²⁵Ca candu ant’essiri arresuscitaus de is mortus, no nci at ai ni coiaus, ni coiadas, ant’essiri perou che angelus in is celus. ²⁶Torrendi a is mortus chi arresuscitant, non dd’eis ligiu in su liburu de Moisè, in su contu de s’orruaxu, comenti Deus dd’iat chistionau, narendi: «Deu seu su Deus de Abramu, su Deus de Isacu e su Deus de Giacu? ²⁷No est Deus de is mortus, ma de is bius. Faddeis meda».

²⁸E fut acostiau unu de is ominis de lei, chi ddus iat intendius chistionendi, biu cumenti ddis iat arrespustu beni, dd’iat pregontau: «Cali cumandamentu est su primu de totus?». ²⁹Gesùs dd’iat arrespustu: «Su primu est: Ascurta, Israeli. Su Sennori Deus nostu, Sennori unigu est ³⁰e as a istimai a su Sennori Deus tuu cun totu su coru tuu, cun totu s’anima tua e cun totu sa menti tua e cun totu sa frotza. ³¹E su de duus, custu: Stima a su prossimu tuu che a tui e totu. Atru cumandamentu prus mannu de i custu no nci nd’at». ³²E s’omini de lei dd’iat nau: «Beni meda, as nau, maistu, est sa beridai. Unu est issu e no nd’at atru foras che issu; ³³e a ddu stimai cun totu su coru e cun totu su sentidu e cun totu sa frotza e a istimai su bixinu comenti e a sei e totu est prus meda de totus is paraduras e de is sacrifitzius». ³⁴E Gesùs biu cumenti iat arrespustu cun sabiori, dd’iat nau: «Non ses aillargu de s’arrenniu de Deus». E nemus s’atriviat prus a ddi fai pregontas.

³⁵E iat arrespustu Gesùs e naràt donendi imparu in su tempru: «Comenti est chi is ominis de lei narant ca su Cristus est fillu de David? ³⁶David e totu iat nau, pigau de su Spiritu santu:

Iat nau su Sennori,a su Sennori miu:

setzidì a manu dereta mia,

fintzas a chi ap’a ponni is nemigus tuus

asuta de is peis tuus.

³⁷David e totu ddi narat Sennori, e tandus de innui est fillu suu?». E meda genti dd’ascurtàt a prexeri.

³⁸E in s’imparu suu, naràt: «Castiaisì de is ominis de lei, ca ddis praxit a passillai cun bestiris bellus e a ddus saludai in is pratzas,³⁹a tenniri is cadiras de ananti in is sinagogas e is primus postus in is prangius. ⁴⁰Custus nc’ingurtint is domus de is fiùdas e pregant meda po iscusa. Custus ant arriciri una cundenna prus manna».

⁴¹E setziu ananti de su tesoru, castiàt comenti sa genti nci getàt soddu de arramini a su tesoru, e medas arricus ndi ddui getànt meda. ⁴²Lompia una fiuda, pobora, nc’iat getau duus soddus, iat essiri unu francu. ⁴³Tzerriaus is iscientis suus ddis iat nau: «Si nau sa beridai: sa fiuda, custa pobora, nci at getau a su tesoru prus de totus is chi funt getendi. ⁴⁴Ca totus ant getau de su chi teniant de srobu; issa perou, in sa poboresa sua, nci at getau totu su chi teniat, totu sa fida sua».