© Vangelo di Marco 1998. Traduzione in sardo campidanese, variante del Sarcidano isilese,

di Antioco e Paolo Ghiani. Consulenza esegetica di Antonio Pinna.
Proposta di traduzione Ghiani 1998 con osservazioni Pinna 1998

Marcu 11,1-33

¹Candu lompint a Gerusalemi, faci a Betfage e a Betania, in s’oru de su monti de is olìas, mandat duus de is iscientis suus ²e ddis narat:«Andai a sa bidda a faci e illuegu intrendinci eis a agatai unu molentenddu acapiau, chi no dd’at mai setziu omini perunu. Scapiaindeddu e betenindeddu. ³E chi calancunu s’at a narri: “Puita seis faendiddu?”, arrespundei: “Su Sennori ndi tenit abisongiu, perou ndi ddu torrat a mandai illuegu a innoi”». ⁴Fiant andaus e iant agatau unu molenteddu acapiau in foras, in sa bia, ananti de una genna e ndi dd’iant scapiau. ⁵Unus cantus de is chi fiant innì ddis iant nau: «Ita seis faendi, scapiendindi su molenteddu?». ⁶Issus ddis iant arrespustu comenti ddis iat nau Gesùs, e ddus iant lassaus fai.

⁷E nd’ingollint su molenteddu anca funt Gesùs e nci ddi getant a pitzus is manteddus insoru e issu dd’iat setziu. ⁸E medas iant isterriu in sa bia is manteddus insoru, atrus arromadura chi iant segau in is cungiaus. ⁹E is chi andànt ainnantis e is chi andànt infatu tzerriànt:

«Osanna!

Beneditu su chi benit a nomini de su Sennori!

¹⁰Beneditu s’arrenniu benenti de su babu nostu David!

Osanna in is celus prus artus!».

¹¹E fut intrau a Gerusalemi a su tempru; e apustis chi iat castiau a ingiriu donnia cosa, sendu ca fut giai a merì a trigadiu, ndi fut andau faci a Betania cun is Doxi.

¹²E sa dì infatu candu fiant andendusindi de Betania, dd’iat pigau famini. ¹³Iat biu de aillargu una mata de figu cun sa folla, fut acostiau no ddu essat agatau cancuna cosa; candu fut acostiau perou iat agatau feti folla, ca non fut tempus de figu. ¹⁴Tandus dd’iat nau: «De su frutu tuu ancu no ndi papit mai prus nemus!». E is iscientis suus dd’iant intendiu.

¹⁵E lompint a Gerusalemi. Intrau a su tempru, iat cumentzau a nci bogai is chi fiant bendendi e comporendi in su tempru e anci furriai is mesas de is cambiamoneda e is cadiras de is bendidoris de columbas. ¹⁶E non premitiàt a chiniechisiat a nci tragai strexus intramesu de su tempru. ¹⁷E ddis donàt imparu, nendiddis: «No ddu at iscritu: “A sa domu mia dd’ant a narri domu de oratzioni, po totus is populus?”. Bosatrus invecias ndeis fatu una gruta de furonis».

¹⁸Dd’iant intendiu is predis maioris e is ominis de lei e cicànt cumenti ddu podiri bociri; difatis ddi timiànt, puita ca totu sa genti fut pigada de s’imparu suu. ¹⁹E a parti de merì ndi fiant bessius de sa tzitadi.

²⁰Su mengianu, passendi, iant biu sa mata de sa figu sicada totu de fundu. ²¹Tandus Perdu di ndi fut arregodau e dd’iat nau: «Maistu, mi’ sa mata de sa figu chi as maleditu, s’est sicada». ²²E arrespundendi Gesùs dd’at nau: «Tenei fidi in Deus! ²³Si nau sa beridai: Chi unu essat nau a i custu monti: “Piga e getadinci a mari”, e in coru non essat dudau, creendi ca su chi narat at a sussediri, dd’at a sussediri. ²⁴Po cussu si nau: Totu su chi pedeis preghendi, creei ca dd’eis giai tentu, e s’at essiri acantzau. ²⁵E candu s’istentais in pregadorìa, chi teneis calancuna cosa contras a calancunu, perdonai, aici chi su Babu de bosatrus, chi est in celus, si perdonit is nexis cosa de bosatrus. (²⁶)

²⁷E fiant torraus a lompiri a Gerusalemi e candu fut girendu in su tempru, fiant acostiaus anca fut issu is predis maioris, is ominis de lei e is mannus ²⁸e dd’iant nau cun cali poderi fais custas cosas? E chini t’at donau su poderi de fai custas cosas?». ²⁹Gesùs ddis iat nau: «Si pregontu una cosa, arrespundeimì e s’ap’a narri cun cali poderi fatzu custas cosas: ³⁰Su batiu de Giuanni ndi beniat de su celu o de is ominis? Arrespundeimì?». ³¹E nd’arrexonànt tra issus, narendi: «Chi dd’arrespundeus: “De su celu”, s’at a narri: “Poita no dd’eis cretiu, tandus?”; ³²Ellu e ita naraus. “De is ominis?”». Ca timiànt a sa genti, poita totus teniant a Giuanni cumenti de chi fessat unu profeta deaderus. ³³Tandus arrespundendu a Gesùs, ddi nant: «No ddu scieus». E Gesùs ddis iat nau: «E nemancu deu si naru cun cali poderi fatzu custas cosas».

Note

11,17ss domu de oratzioni: però in questo modo si perde il collegamento con l’insegnamento sulla “preghiera” che inquadra tutto il racconto del tempio:  cf v. 24: “tutto quello che pregate e domandate”