© Vangelo di Luca 2001. Traduzione in sardo campidanese, variante del Sarcidano isilese, 
di Antioco e Paolo Ghiani. Consulenza esegetica di Antonio Pinna.

pubblicata su
Vita Nostra 2000, anno 40, n. 44, Domenica 10 dicembre 2000, p. 7:
Lc 3,10-18 e passi paralleli di Mt 3,11-12; Mc 1,7-8; Gv 1,26-27

Luca 3,10-18 passi paralleli

In neretto le parole esclusive di un vangelo. In corsivo le parole comuni ai tre vangeli sinottici o anche a Giovanni. In corsivo sottolineato le parole che Luca e Matteo prendono forse dalla fonte Q, indipendentemente da Marco. A parole uguali in sardo corrispondono parole uguali in greco.

Luca 3,10-18 

3¹⁰ E sa genti ddi  pregontàt (a Giuanni), narendi: «Tandus ita eus a fai?» ¹¹ E arrespundendi ddis naràt: «Chini tenit duas bestis ndi fatzat parti a chini no ndi tenit, e a chini tenit  mandiari fatzat sa matessi cosa».

¹² Fiant andaus fintzas e datzieris po si batiai e dd’ant nau: «Su maistu, ita eus fai?». ¹³ Issu tandus ddis at nau: «Non pretendais prus de cantu s’ant cumandau.

¹⁴ Fintzas e unuscantu sordaus ddi pregontànt, narendi: «E fintzas e nosu  ita eus fai?». E ddis at nau: «No axagareis a nemus e non ndi scrufais nudda a nemus e cuntentaisì de sa paga cosa de bosatrus».

¹⁵ Sigomenti sa genti fiat abetendi e totus fiant arrexonendi  in coru insoru po su contu de Giuanni chi non fessat issu su Messia, ¹⁶ Giuanni at arrespustu narendi a totus:

«Deu si bàtiu cun àcua feti; ma benit cussu chi est prus forti de mimi, a issu non seu bonu de ndi ddi scapiai sa corria de is sàndullus: issu s’at a batiai in Spìritu santu e fogu.

¹⁷ Sa pàlia de bentulai issu dda portat in sa manu sua po illimpiai s’axrola sua e po incungiai su trigu

in su stàulu cosa sua; sa palla, a s’imbessi, dd’at a abbruxai cun fogu chi no si ndi studat.

¹⁸ Aici duncas narendi cun sentidu medas e atras cosas, donàt novas bonas a su pòpulu.

Mt  3,11-12

Deu si battiu in àcua feti po si fai furriai de penzamentu, ma cussu chi benit apustis miu est prus forti de mimi, a issu non seu bonu de ndi ddi pigai is sàndullus ;issu s’at a batiai in Spìritu santu e fogu.

Sa pàlia de bentulai issu dda portat in sa manu sua e at a illimpiai s’axrola sua e at a incungiai su trigu suu in su stàulu cosa sua; sa palla, a s’imbessi, dd’at a abbruxai cun fogu chi non si ndi studat.

Mc 1,7-8: ⁷e predicàt narendi: «Benit apustis miu cussu chi est prus forti de mimi, a issu non non seu bonu, incrubendimì, de ndi ddi scapiai sa corria de is sàndullus. ⁸Deu s’apu batiau cun àcua, ma issu s’at a batiai cun Spiritu santu».

Gv 1,26-27 : Giuanni ddis at arrespustu narendi : Deu bàtiu in àcua; in mesu de bosatrus ddu est unu chi bosatrus non conosceis, su chi benit apustis miu ; a issu non seu dìnniu deu e totu po ndi ddi scapiai sa corria de is sàndullus.