1) Mt 11,01-19

Campidanese
 

1 E est sussediu candu Gesus at acabau de donai pretzetus a is Doxi scientis suus, ca est partiu de innì po donai imparu e predicai in is citadis insoru.

2 E Giuanni, in presoni, iat intendiu  de is operas de su Cristus e dd'at mandau a nai po mesu de is iscientis suus:

3 "Su chi depit benniri, tui ses? O atru de atra casta nd'abetaus?".

4 E Gesus, arrespundendi, ddis at nau: "Baxei, torrai sceda a Giuanni de su chi ascurtais e bieis:

tzrupus torrant a biri 
e tzopus caminant, 
lebrosus funt sanaus 
e surdus intendint, 
e mortus si ndi torrant a pesai
e a poburus est donada sa nova bona.

6 E biadu est chini no at a imbruchinai po mori miu".

7 Issus fiant andendisindi, candu Gesus at cumentzau a fueddai de Giuanni a sa genti:

 "Ita seis bessius a biri castiai a su desertu? No eis èssiri bessius a castiai una canna santzinada de su bentu!

8 Ellu ita seis bessius a biri? Unu bestiu de pannu fini? Siguru ca no, ca is chi si bestint de pannu fini bivint funt in is domus de is urreis.

9 Ma tandus ita seis bessius a biri? Unu profeta? Eia, si naru, e fintzas e prus de unu profeta.
10 Est de issu chi ddu at iscritu:
 

"Mira, dèu mandu su missu miu ananti tuu,
ainnanti tuu issu t'at a aprontai sa bia".

11 Deaderus, si ddu nau dèu, mancu unu, de is chi funt nascius de femina, s'est pesau prus mannu de Giuanni su Batista. Ma su prus pitiu in s'arrenniu de is celus est prus mannu de issu.

12 E de candu Giuanni su Batista at incumentzau a batiai fintzas a imoi, s'arrenniu de is celus sunfrit balentìa e is balentis si ndi ponint meris.

13 Ca totus is Profetas e sa Lei ant fueddau de s'arrenniu fintzas a lòmpiri Giuanni.
14 E chi ddu boleis cumprendiri, est issu cuddu Allìas chi narànt ca depiat bénniri.
15 Chini portat origas, ascurtit".

16 E a chini ap’a assimbillari sa genti de icustu tempus ? Assimbillat a pipius sètzius in is pratzas chi tzerriendi a is cumpangius narant:
 

17 “Eus sonau su sulitu po bosatrus e no eis baddau,
eus cantau un’atitidu e non s’eis addobbau su petus.
 

18 Ca est beniu Giuanni chi non papat e non bufat e narant : portat unu dimòniu.
19 Est beniu su Fillu de s’òmini chi papat e bufat, e narant: mi’ unu pasteri e un imbriagoni, amigu de is datzieris e de is pecadoris. 
Ma a su sabiori dd’ant torrau su giustu  is operas suas e totu.

 

Logudorese

Mt Logudorese

Mt 11,1 E istèit chi Gesùs, daghi apèit agabbadu de dare cumandhamentos a sos dòighi dischentes suos, si movèit dae cue pro insinzare e preigare in sas tzitades issoro.

2 Assora E Giuanne, in presone, daghi intendhèit in sa presone sas òberas de su Cristos,  

3 e l'imbièit cun sos dischentes suos a li narrer : "Ses tue su chi devet benner o ndh'aisetamus un'àteru?"

4 E, rispondhendhe, Gesùs lis nerzèit: "Tucade e annuntziade a Giuanne sas cosas chi intendhides e bidides:

5 tzegos torran a bider e istropiados caminan, lebbrosos sun purificados dae sa maladìa e surdos intendhen e mortos si ndhe pesan e-i sa bona noa est annuntziada a disamparados.

6 E biadu est chie no trambuchet pro causa mia".

7 Mentras chi custos si che fin tuchendhe, Gesùs benzèit a faeddhare de Giuanne a sas zentòrias: 

"Ite ndhe sezis bènnidos a abbaidare in su desertu? Una canna isbàtida dae su 'entu?

8 Ma ite ndhe seziz bènnidos a bider? Un'òmine 'estidu cun bestes lussuosas?  Acò chi sos chi giughen bestes lussuosas sun in sas domos de sos res.

9 Ma ite ndhe sezis bènnidos a bider? Unu profeta? Sì, bos naro, e prus mannu de unu profeta.

10 Custu est su de chie est iscritu: "Acò chi eo imbìo a sa presentzia tua su nuntziu meu, 
chi at a preparare sa 'ia tua addainanti a tie"".

11 In veridade bos naro: no s'est pesadu intre sos nàschidos dae fèminas unu prus mannu de Giuanne su Batista; ma su prus minore in su regnu 'e sos chelos est prus mannu de isse".

12 "Dae sas dies de Giuanne su Batista fintzas a como su regnu 'e sos chelos patit violentzia e-i sos violentos si ndh'apodèran.

13 Totu sos profetas, difatis, e-i sa Lege fintzas a Giuanne l'an profetizadu,
14 e, si 'ois lu cherides acoglire, isse est cuss'Elìas chi naraìan chi devìat benner.
15 Chie giughet orijas intendhat!

16 A chie, duncas, apo a assimizare custa generatzione? S'assimizat a sos pitzinnos sètzidos in sas piatas chi abboghinendhe a sos cumpanzos
17 naran: - Amus sonadu su sulitu pro 'ois e no azis balladu; amus cantadu atìtidos e no bos azis iscutu sa petorra -.

18 Est bènnidu, difatis, Giuanne, chi no màndhigat e no bìet, e naran: - Unu demòniu giughet -.
19 Est bènnidu su Fizu 'e s' Òmine, chi màndhigat e bìet, e naran: - Acò un'òmine mandhigadore e bidore, amigu de gabbelleris e pecadores -.
Ma sa sabidorìa at tentu giustitzia dae sas òberas suas".
 

2) Guida alla lettura di Gen 2,4-24 (a integrazione della "Grande Novena"; cf sezione relativa)