© Vangelo di Marco 1999. Traduzione in sardo campidanese, variante del Sarcidano isilese,

di Antioco e Paolo Ghiani. Consulenza esegetica di Antonio Pinna.
Proposta di traduzione Ghiani 1999 con osservazioni Pinna 1999-2000

Marcu 1,1-45  

1 Cumentzu de s’evangèliu de Gesùs Cristu, Fillu de Deus. 2Comenti ddu at iscritu in su profeta Isaia: 

Mira, deu mandu su missu miu ananti tuu, 
issu t’at a aprontai sa bia. 
3Una boxi tzerriat in su desertu: 
aprontai sa bia de su Sennori, 
aderetzaiddi is moris.

4Si fut incrarau Giuanni, cussu chi batiat in su desertu, predichendi unu batiu de penitentzia a perdonu de is pecaus. 5Anca fut issu suncurriat totu canta sa Giudea e totu is Gerosolimitanus. E arreconnoscendi is pecaus intzoru si faiant batiai de issu in s’arriu Giordanu. 6E Giuanni portàt unu bestiri de pilu de camellu e in lumbus una cintroxa de peddi, papàt pibitziris e meli aresti 7e predicàt narendi: «Benit apustis miu su chi est prus forti de mimi, deu non seu dìnniu, incrubendimì, de ndi ddi scapiai is corrias de is andalis. 8Deu s’apu batiau cun àcua, ma issu s’at a batiai cun Spiritu santu». 

9In cussas dis Gesùs ndi fut benniu de Nàzaret de Galilea e fut istetiu batiau de Giuanni in su Giordanu. 10E illuegu bessendindi de s’àcua iat biu is celus aberendusì e su Spiritu abascendindeddi a pitzus comenti de una columba. 11E de is celus ndi fut lòmpia una boxi: «Tui ses su fillu miu stimau, tui mi ses aggradessiu». 

12Apustis su Spiritu nci dd’iat impèlliu a su desertu. 13E fiat abarrau coranta dis in su desertu a ddu tentai su tiaulu, biviat cun is bestias e is angelus ddu srebiant. 

14Apustis chi Giuanni fut istetiu intregau, Gesùs fut andau in Galilea predichendi sa nova bona de Deus 15e narendi: «Est cumprìu su tempus, nd’est acostiau s’arrènniu de Deus; furriai de pentzamentu e creei a sa nova bona». 
16Passendi in s’oru de su mari de Galilea iat biu a Simoni e a Andria, su fradi de Simoni, getendinci s’arretza a mari, ca fiant piscadoris. 17E Gesùs ddis at nau: «Sodigai infatu miu e s’ap’a fai piscadoris de òminis». 18E illuegu iant lassau is arretzas e dd’iant sodigau. 19Pagu pagu prus ainnantis iat biu a Giacu de Zebedeu e a Giuanni su fradi, aconcendi is arretzas in sa barca. 20Illuegu ddus iat tzerriaus. Issus iant lassau in sa barca a Zebedeu, su babu intzoru, cun is gerronaderis e si ndi fiant andaus infatu suu. 

21Intrant a Cafarnàu e illuegu su sàbudu fiat intrau a sa sinagoga e donàt imparu. 22E fiant spantaus de sa dotrina sua, ca fiat imparendiddus cun poderi e non comenti de is ominis de lei. 23E tandus, ddu iat in sa sinagoga un’òmini cun d’unu spiritu malu e iat aboxinau, narendi: 24«Ita teneus de biri cun tui, Gesùs Nazarenu? Ses benniu po isperdiri a nosu! Ddu sciu, chini ses: su santu de Deus». 25E Gesùs dd’iat amaletzau, narendi: «Citudì! Bessindeddi a foras!». 26E su spiritu malu, trotoxendiddu totu, e aboxinendi a boxi manna ndi ddi fut bessiu. 27E totus fiant abarraus aici spantaus chi, chistionant s’unu cun s’atru, narendi: «Ita cosa est custa? Unu imparu nou donau cun poderi. Cumandat fintzas e a is spiritus malus e ddi ponint in menti!». 28E sa nomenada sua fut bessia a lestru in dònnia logu e in totu is làcanas de sa Galilea. 

29E bessius de sa sinagoga fiant andaus illuegu a domu de Simoni e de Andria cun Giacu e Giuanni. 30Sa sroga de Simoni fiat crocada cun sa callentura e illuegu ddi  fueddant de issa. 31Issu fut acostiau e ndi dd’iat pesada pighendidda a sa manu; sa callentura ndi ddi fut bessia e issa ddus  srebiat. 
32A merì, agoa chi su soli nci fut calau, ndi ddi betiant totu is fertus de mali e is chi fiant in poderi de su dimoniu. 33Totu sa citai fiat pinnigada ananti de sa porta. 34E iat sanau malaidus medas, de donnia casta de mali e nc’iat bogau medas dimonius; 34ma a is dimonius no ddus lassàt fueddai, ca scìant chini fiat. 

35A su chitzi, innantis de obresci, si ndi fut pesau, nci fut bessiu e si ndi fut andau a unu logu assolau e innì megàt de pregai. 36Si fut postu a ddu cicai Simoni e is chi fiant cun issu, 37e dd’iant agatau e ddi narant: «Totus funt in cica tua». 38E ddis narat: «Andeus a atru logu, peri is biddas de acanta, po predicai innì puru ca est po custu chi seu bènniu!». 39E fiat andau predichendi peri is sinagogas intzoru, in totu sa Galilea e boghendinci is dimonius. 

40 Tandus  acostiat acanta sua unu lebrosu preghendiddu e ingenughendisì e narendiddi: «Chi bolis, tui mi podis sanai!». 41 Arrennega, iat allonghiau sa manu, dd’iat tocau e ddi narat: «Bollu, sana!». 42 Illuegu sa lebra fut sparèssia e fut sanau. 43 E amaletzendiddu de pressi nci dd’iat bogau, 44 e ddi narat: «Castia, non nerist nudda a nemus, ma bai e faidì biri de su predi e fai, ca ses torrau sanu, s’oferta comenti at cumandau Mosè, chi ddis siat de testimongiu». 45 a cuddu si ndi fut andau e iat cumentzau a bandiri e a ispainai aici meda sa cosa, chi Gesùs non podiat prus intrai a craru in d’una citai, ma abarràt in foras, in logus assolaus e beniant anca fut issu de innuisisiat.